IGANDEA
Kristauen
jefeek diote beren jainkoak atseden eguna izendatu zuela igandea, nahiz eta
beraiek egun horretan lan egiten duten soilik (eta guti). Presook berdin-berdin
ateratzen gara patiora igandetan ere, bueltak eta bueltak ematera atsedenik
gabe.
Aztekek
jainkoen edaria deitzen zioten txokolateari, eta jende hilgarriak debekaturik
zeukan. Guri, gosaltzeko, kakao edaria banatzen digute igandeetan, kruasana eta
guzi.
Erraten
denaren arabera, eliza bat omen dago espetxe barruan eta, nahi izanez gero,
apez katolikoa, edo protestantea, edo musulmana, edo judua eska dezakegu.
Ni,
bistan denez, ez naiz elizatik pasatu. Are gutiago galdetu dut apez bat. Hala
eta ere, ez zait iruditu jainko aunitz inguru hauetan dagoenik. Ez onik
bederen.
TABU
Arras interesgarria
omen den aldizkari komertzialaren titular nagusiak honela dio: Azken ikerketak. Zakilaren egiak eta mitoak.
Argazkian
mutil puska ageri da, biluzik, gihartsu, depilatuta, irribarre eta begi
politekin. Hankartea eskuekin estaltzen du.
Egia
al da zakila delako hori existitzen denik?
Zientzialariak,
politikariak eta apezak bildurik daude, arrapostua adostu nahian. Eztabaidaren
emaitza luze gabe komunikatuko digute.
Bisitetatik
bueltan biluzarazten gaituen kartzelaria kontsultatzea gomendatuko nieke nik.
SEIAK
BAT
Baxenabartar
batek erran zidan gu ez ginela nafar bakarrak.
Xiberotar
batek Iparralde kostaldea baino gehiago dela.
Baionar
batek Euskal Herria Hegoalde baino gehiago dela.
Nafarrok,
Hegoalde baskongadak baino gehiago dela erantzuten diegu.
Bizkaitar
batek aldarrikatzen zuen bazegoela batzokietatik kanpo bizitzerik.
Eta
giputxi batek Baztanen non zegoen onddorik galdetu zidan.
…
-Zer?
Araba?
-Bai,
Gasteiz inguratzen duen lurralde hori.
-A,
bai, Araba, egia da.
-Araban…
Araban…
Araban
bagare?
IPARRALDEKO
BERTSIOA
Lagun
astapito batek erraten zidan Nafarroako Erribera Españari eman beharko geniola
negoziazioan. Bazekien gurasoak Erriberakoak ditudala, eta zirikatzeko erraten
zidan.
Berriki,
Iparraldeko nafar batek, Biarritz arazo bat zela zioen. Pariseko aberatsen
putetxea omen da, hitzaren zentzurik irekienean (aberatsa zein putetxea).
-Negoziazioan
Frantziari eman beharko diogu.
Nik
ez dut familiarik bertan, zuk?
TEORIA
ETA PRAKTIKA
“Gutieneko”
droga kontsumoa baimenduko dela espetxeko barne-arautegian agertzea
eskandalagarria litzateke.
Ez
agertzea hipokresia.
Tolosako
aireak Euskal Herrikoak ez duen usain goxoa dauka eta presoek kili-kiliak
dituzte esku-ahurretan.
AURPEGIA
Onartu
beharko dut azkenean, drogazale aurpegia daukat. Bestan denetarik eskaini
didate beti. Atzerrian denetarik eskaini didate beti. Kontroletan hautsontzia
begiratzen didate beti. Aireportuetan droga detektatzen duten zakurrek
detektatzen naute beti.
Espetxean,
drogarik gabeko eremu libre horretan, haxixa erosteko eskaintzak bata
bertzearen gibeletik datozkit.
Bisitetatik
ateratzean arroparen zirrikituak eta gorputzaren ziloak begiratzen dizkigun kartzelaria
etorri zait burura. Bertzeok, gure lanetan eraginkorrak ez bagara, kanporatu
egiten gaituzte.
BIZIOAK
“Harrera”
moduluan (normalean aste bat ematen da bertan espetxera ailegatzean nahiz eta
ni hiru eman ditudan), lehenbiziko egunetan, eta sosaren afera bideratu
bitartean, ea tabakorik behar genuen galdetu ziguten kartzelariek.
Nik
ez dut erretzen eta ez zidaten galdetu ea boligraforik eta paperik behar nuen.
iruzkinik ez:
Argitaratu iruzkina