HEGAN
Españolez
las noticias vuelan erraten da
(albisteek hegan egiten dute). Gaurko bisitan hondar asteetako egunkarietatik
bildutako orriak erakutsi dizkit amak.
Albiste
izan naiz. Baina ez dut hegan egin, bertzenaz ez nintzen hemen egonen.
KOSTUA
Prentsan
irakurri dut amiantoa kostu gutiko aislantea dela. Segituan, egien hiztegian
begiratu dut, eta zera azaltzen zuen:
“Kostu
guti”- konstruktoreei etekin ekonomiko handia eta langileei biriketako minbizia
eragiten dien kostua.
HITZEN
GEZURRA
Erratzun,
Izpegiko bideak Frantziako errepidea du izena baina Baigorrira joaten da.
Elizondok
erdi-erdian du eliza.
Garazin,
Orreagarantz doa Españako karrika.
Baionako
euskaldunen plazan euskara guti aditzen da.
Urruñan
errekarik ez, urtegirik ez eta presarik ez Presaburu karrikan.
Apeztegia
jauregian ez dago apezik eta Apezetxean gutitan egoten da.
Putetxean
puta guti eta senar asko dago.
Espetxean
Espez galdegin diot kartzelari bati:
-Esperantza?
-galdetu dit ilupa aurpegia paratuz-, ez dakit, emakumeen moduluan beharbada…
ZERGATIK?
Zergatik
diogu Antzinako Historia Mesopotamia eta inguruko herrien historia erran nahi
dugularik? Zergatik diogu Historia Unibertsala mendebaldeko historia erran nahi
dugularik? Zergatik diogu mendebaldea Europa eta Ipar Amerikako Estatu Batuak
erran nahi dugularik? Zergatik diogu hombre
de color beltza erran nahi dugularik? Zergatik diogu amodioa sexua erran
nahi dugularik? Zergatik diogu indigena indio erran nahi dugularik? Zergatik
diogu demokrazia gure demokrazia
erran nahi dugularik? Zergatik diogu hirugarren mundua gure zabortegiak, gure
denpentsak… erran nahi dugularik? Zergatik diogu unibertsoa mundua erran nahi
dugularik? Zergatik diogu mundua gu eta gure lagunak erran nahi dugularik?
Zergatik diogu garapen jasangarria naturaren txikizioa erran nahi dugularik?
Zergatik diogu funtzionario kartzelaria edo maton edo boki erran nahi
dugularik? Zergatik diogu moro arabiarra erran nahi dugularik? Zergatik diogu
arabiarra musulmana erran nahi dugularik? Zergatik diogu zibilizatuta
domestikatuta erran nahi dugularik? Zergatik mozorrotzen dugu komunikazioa
komunikatzeko?
Zergatik
diot komunikazioa mozorrotu gezurra erratea erran nahi dudalarik?
iruzkinik ez:
Argitaratu iruzkina