V
Erori berria zegoen elurra,
freskoa erraten den moduan, eta bidea irekitzea lan neketsua zen. Gainera,
haizeak gogor jotzen zuen aurpegian. Gogotsu iratzarri nintzen baina, eta soka-buru
joatea erabaki nuen.
Bueno, horregatik eta
Karmelori lan pixka bat kentzearren. Izan ere, lehenbiziko eguneko bide ia
guztian bera joan zen soka-buru, eta elurretan aztarna irekitzeak badu bere
lana. Horretatik aparte, ohi baino serioago ikusten nuen gainera. Ez zuen ja ere
erraten, baina banekien Eider eta Jon etorri izanak apur bat kezkatzen zuela.
Urrundik nabari zitzaion. Karmelo ez da horren serioa, kontrakoa baizik, zinez
tipo alaia, batez ere lagunartean.
Edozein modutan, Karmelo
deskribatzen duen ezaugarri bat baldin badago, hori ateoa izatearena da. Ateo
aktiboa, militantea. Alajainkoa, ez dut nire bizi guztian horren pertsona ateoa
ezagutu!
Eguberriak mendian igarotzeko
hasierako proposamena, adibidez, Karmelok berak egin zuen, data nazkagarri
horiei nolabaiteko boikota egiteko. Bertze adibide bat paratzeagatik, anekdota
txiki bat kontatuko dut. Pic de Mallacanera abiatzeko aitzineko gaua zen eta
garagardoz aseak geunden Zubi Puntako zokoan. Bada, “aquí se pide pa´ Cristo y
no se da ni pa´ Dios” pintatu nahi zuen elizako atean. Ideia horrekin tematurik
eman zuen gau guztia, irri eta orro.
Ni soka-buru joanez gero,
Karmelo apur bat erlaxatuko zen. Edo hori zen nire asmoa bederen.
Haizeak ez zuen ibilbidea
batere erosoa egiten eta elurra uste baino lan gehiago ematen ari zitzaidan.
Hala ere, arroka eta izotz gune zenbait ari ginen gainditzen sobera
buruhausterik gabe. Hau erranik, onartu behar dut ni ere gehiegi erlaxatu
nintzela akaso, nire gauzetan pentsatzen bidea irekitzen nuen bizkitartean.
Nire Bateko Urreko giltza
aurreko gurpilaren gibelean ezkutaturik utzia nuen, ezkerrekoan, egin behar
genuen zeharkaldian zehar niri edo nire motxilari zer edo zer gertatuz gero,
etxera itzuli ahal izateko. Giltza ezkutatzeko ea ez ote ziren hobe eskuineko
gurpila edo gibelekoak ari nintzen pentsatzen. Norbait asmo txarrekin hurbilduz
gero, ezkerrekoa begiratuko zuen lehenengo, ez? Bai, gidariaren aldekoa alegia.
Logika horri jarraiturik, gibeleko eskuineko gurpila egokiena izanen zela
ondorioztatzen ari nintzen eta…
-Arriufa!
Zapaldua nuen izotz plaka
hautsi eta, ohartu orduko, maldan beheiti irristan nindoan. Berehala
erreakzionatu nuen. Lehenbiziko mugimendu batean gorputza jiratu eta pitoz
beheiti paratu nintzen. Pioleta elurretan sartu eta gorputzaren pisua bere
gainean paratzen ahalegindu nintzen, oinak goitituz eta belaunak tolestuz,
erorketaren abiadura murriztuz gorputza erabat gelditu artio. Hagitz azkar izan
zen dena, eta hala behar du izan, bertzenaz, maldan beheiti abiadura irabazi
ahala zailagoa da gelditzen, horregatik da hain garrantzitsua lehenbailehen
erreakzionatzea. Bertze aldetik ere, soka-kideek geldituko nindutela pentsatu
nuen. Hiru izanki, pisu edo abiadura handia hartu beharko nukeen nirekin batera
eramateko.
-Ongi hago?
-Bai, ongi.
-Seguru?
-Bai, ongi nagok.
-Seguru?
-Bai… Lasai hadi Karmelito,
oraindik ez zaidak eta segaren andereñoarengana joateko tenorea ailegatu.
-Ixo! Eta uztak
bakean segaren andereñoa, ez izan makabroa -sartu zen Eider.
-Hobe heriotxari irri
egitea hark guri egitea baino, esta? -erran zuen Jonek.
-Ez dakit ba, beti erran ohi
da irri egiten azkenak hobeki egiten duela, ez?
-Tira, ez gaitezen
dramatikoak paratu -moztu nuen elkarrizketa-, metro guti batzuk bota nauk,
bertzerik ez.
***
Bigarren kanpamentua muntatu
genuen tokiraino ezusteko gehiagorik gabe egin genuen. Haizeak ez zuen
tregoarik ematen eta gero eta maizago egiten zuen elurra. Ez zirudien hobera
eginen zuenik. Kontrakoa.
-Iragarpenek ona egin behar
zuela zioten, edo ez hain txarra bederen -justifikatu zuen Karmelok bere burua.
-Ona edo ez hain txarra ez dituk gauza bera -estutu
nuen nik.
-Berdin dio zer
dioten paperek, telebistek edo internetek -erran zuen Eiderrek posizio komuna
bilatu nahian-, hemen gaude jada, eta kontrakoa erabakitzen ez dugun
bizkitartean, aitzinera eginen dugu, ez?
-Horise bera pentxatxen dut nik -itxi zuen Jonek
eztabaida.
Hotz zegoen giroa. Kanpoan
zein barnean.
iruzkinik ez:
Argitaratu iruzkina